Tari Caci inggih punika silih tunggil sesolahan utawi tarian sané wénten ring Florés, Nusa Tenggara Timur, Indonésia. Tari puniki marupa tari perang tur dados tari permainan rakyat sané kasolahang olih kalih penari truna sané maperang nganggé perisai utawi taméng. Tari puniki kalaksanayang antuk nyambra musim panén miwah dados ritual nyambran awarsa. Tarian puniki kasolahang ri tatkala pembukaan lahan, upacara adat sané ageng, miwah dados panyanggra tamiu sané penting.[1]
Penari sané makta cambuk utawi pecut dados sané nyerang tur anak lianan sané kaserang punika makta perisai utawi taméng. Anak sané dados penyerang kawastanin paki, sané mautsaha mecut lawannyané nganggén pecut sané kakaryanin saking kulit kebo utawi sampi sané tuh. Genah ngamakta pecut taler kakaryanin saking lilitan kulit kebo. Ujung pecut kapasangin kulit kebo sané tipis tur sané tuh miwah keras sané mawasta lempa utawi lidi enau sané kantun gadang (pori). Anak truna sané dados penangkis kawastanin ta'ang, sané nangkis pecut nganggén perisai sané mawasta nggiling miwah busur sané kakaryanin saking tiing tur rotan sané mawasta agang utawi tereng. Perisai punika wentuknyané bunder kalapisin olih kulit kebo sané tuh.
- ↑ Jampi, Hironimus; Nawir, Muhammad; Hadisaputra, Hadisaputra (2019-10-15). "Nilai Kesenian Budaya Tarian Caci Pada Masyarakat Manggarai Kabupatén Manggarai Timur". Equilibrium: Jurnal Pendidikan. 7 (2): 235–241. doi:10.26618/equilibrium.v7i2.2663. ISSN 2477-0221.